கவிதை ::1

நான் யாருக்கேனும் எழுதும்
வரிகளிலும் உனக்கான
வார்த்தைகள் இருக்கும்
நீ யாருக்கேனும் இசைக்கும்
கானத்திலும் எனக்கான
இதமிருக்கும்
அடையாளம் காணும்
ஆழ் பரப்பில்
அர்த்தப்படுகின்றன எல்லா வரிகளும்
எல்லோருக்குமான பாடல்களும்.

கவிதை ::2

வண்ணம் மாறும்
சோப்புக்குமிழிகளை
கையிலேந்த ஓயாமல் துரத்திடும் சிறுமி
அவள் புன்னகையை
சேகரித்துக் கொண்டிருக்கிறான்
குமிழ் ஊதுபவன்...
குமிழாக சில காலம்
புன்னகையாய் சில காலம்
கழிந்தழியும் வாழ்நாள்.