அவளாய் தான் இருக்கக்கூடும்!.. பெண்ணிலா!
01.
அவளாய் தான் இருக்கக்கூடும்!
---------------------------------------
அது
அவளாய் தான் இருக்கக்கூடும்!
ஆழ் நித்திரையில்
மெல்லிய இழைக்காற்று
கவிதை பேசுவதும்,
நினைவுகளை கையகப்படுத்தி
கனவுகளை திரை போடுவதும்,
போர்த்திய போர்வையை
கால் மாட்டில் இழுத்துவிடுவதும்,
நிச்சயம்
அவளாய் தான் இருக்கக்கூடும்!
நாளை
எப்படியும்
அவளிடம் சொல்லிவிடுவதென்ற
தீர்மானத்தோடு
ஒவ்வொரு இரவும் விடைபெறுகிறது!
02.
பெண்ணிலா!
-------------------
இருட்டணைத்த மொட்டைமாடியில்
முதலில்
ஒரு வால் கொண்ட விண்மீன் தான்
போரிட எத்தனித்திருந்தது!
மின்னல் வேகத்தில்
மடிந்து போனது
மற்ற மீன்களுக்கு
ஒரு கிலியை ஏற்படுத்தியிருக்கக்கூடும்!
சீற்றத்துடன்
வெள்ளொளியை கக்கியவாறு
ஆணவத்துடன் முதல் அடி எடுத்துவைக்கிறாள்
வெண்ணிலா!
பின்னடி வைக்காமலே
விண்மீன்கள் ஒன்றுவிடாமல்
பின்வாங்கி கொண்டன!
நீயா நானா என்ற
தீர்மானம் கொண்டு
அவள் நெருங்கிவரவும்
என்னவள்
தலை சுற்றியிருந்த
நூலாடை மெல்ல நழுவவும்
சரியாய் இருந்தது!
தோற்ற பொலிவில்
தோற்றுப்போனவள்
ஒத்துக்கொள்ளாமல் ஒளிந்துகொண்டாள்
மேகமூட்டத்தினூடே!
பிரசுரிக்கப்பட்ட திகதி: 2010-04-13