வரலாற்றை வாழ்தல்
----------------------------
வெளிப்படையில்லா
விரோதத்துடன்
முகம் நோக்க முடியா
முகங்களுடன்
நமை கடக்கின்றோம் நாம்.
உன் பிள்ளைக்கு நானும்
நம் பிள்ளைகளுக்கு நாமும்
துணையாய் இருந்தது பற்றி
சிந்திக்க வேண்டாம்.
எனது மனைவியின் பிரசவத்திற்கு
உனது மனைவியின்
தாலியை அடகு வைத்து
உதவியது பழைய கதையாக
இருந்து விட்டு போகட்டும்.
வெசாக் தோரண மகிழ்வில்
நம் குழந்தையர் கூடி
மகிழ வேண்டாம்.
ஹனிபாவின் குழந்தை
பூச்சூடி அழகு பார்த்ததை
நாம் கூடியிருந்து மகிழ்ந்ததை
மீட்டவும் வேண்டாம்.
நத்தாரில் அந்தோணி குடும்பம்
அளிக்கும் இனிப்பும்இ பரிசும் பற்றி
முடிந்தால்
ஓரு காலத்தில்….. என
பேரர்களுக்கு கதை கூறுவோம்.
நாட்டின் பேரால்
தேபக்தியின் பேரால்
இன மதத்தின் பேரால்
பகிர்வை பகிர்வு செய்து விடுவோம்.
பலகாரமும் பாற்சோறும்
வட்டிலாப்பமும் கேக்கும் செய்து
நாம் நாமே தனித்தனியாய்
சாப்பிட்டுக் கொள்வோம்.
கூட்டு வாழ்வை உடைத்து
குழந்தைகட்கு கொடுத்திருக்கும்
விளையாட்டுத் துப்பாக்கிகளை
மீளப் பெறவேண்டாம்.
விட்டுக் கொடுப்பிலா
வேலிச் சண்டைகளுக்கு
வீரர்களை தயார்படுத்த
வெறும் பழி நமக்கு வேண்டாம்.
வரலாறு நமை
தண்டிக்கவும் வேண்டாம்
நமை இழந்த துயரால்
நமக்குள் இருந்து
வாழ்ந்து விடவும் வேண்டாம்.
பிரசுரிக்கப்பட்ட திகதி: 2010-01-01